प्रदेशबासीलाई सुखी बनाउने – मन्त्रि बिमला केसी

राजेन्द्र नेपाली, काठमाडाैं

कर्णाली प्रदेश भूमी व्यवस्था, कृषी तथा सहकारी मन्त्री बिमला केसीले प्रदेशबासीलाई सुखी बनाउने गरी  सरकारले योजनाको जग बसाल्ने काम गरिरहेको बताएकी छन् । उनले कर्णालीको प्राकृतिक साधन श्रोतलाई उपयोग गर्दै नागरिकको जीवन उन्नत बनाउन सरकारले योजना बनाएको बताइन् ।

कर्णाली प्रदेशका विभिन्न जिल्लामा स्थायी घर भइ हाल काठमाडौँमा कार्यरत पत्रकारसँगको भेटघाटमा मन्त्री केसीले गरिबी, स्वास्थ्य समस्या लगायतका नकारात्मक कुराको पहिचान भएको कर्णालीलाई समृद्ध र सुखारी प्रदेश बनाउन सरकारले विभिन्न योजना बनाएको जानकारी दिईन् ।

विपद् पर्दा साथमा सरकार छ भन्ने अनुभूतिको होस् भनेर प्रदेशका सबै नागरिकको बीमा गरिएको बताइन् । उनले कर्णालीका नागरिकसँगै त्यहाँ खट्नेहरुको पनि बीमा गरिएको जानकारी दिइन् । त्यसैगरी प्रदेश सरकारले गरिब लक्षित अनुदान कार्यक्रम ल्याएको भन्दै केसीले भनिन्, “संघीय सरकारले ल्याएको कृषि अनुदान पनि प्रभावकार नभएको अनुभव छ, हामीले गरिब लक्षित कृषि अनुदान कार्यक्रम ल्याएका छौँ । यो अनुदान गरिबले मात्रै पाउनेछन् ।” उनले सरकारले कृषकलाई ऋणसँगै कामको आधारमा अनुदानको व्यवस्था पनि गरेको बताइन् ।

भूमी व्यवस्थाका कारण प्रदेश सरकारले भौतिक संरचना बनाउन नसकेको बताइन् । उनले सानो काम गर्दा पनि संघीय सरकारसँग अनुमति लिनुपर्ने, संघीय सरकारले जमिन दिनुपर्ने बाध्यकताका कारण समस्या भएको बताइन् । “प्रदेश सरकारले संघीय सरकारसँग लिजमा लिनुपर्ने हुन्छ, त्यो प्रक्रिया निकै झन्झटिलो बनाइएको छ । प्रदेश स्तरमा रंगशाला, कृषि भवनलगायत भौतिक संचरना रोकिएका छन् । बजेट फ्रिज भएको छ । मन्त्रिपरिषदबाट निर्णय गरेर संघमा पठाएका छौँ तर अहिलेसम्म कुनै सुनुवाई भएको छैन” मन्त्री केसीले भनिन् ।

मन्त्री केसीले प्रदेश सरकारले गरेका रचनात्मक सल्लाह र राम्रा कामलाई जनतासमक्ष पुर्‍याउन सहयोग गर्न पत्रकारहरुलाई आग्रह समेत गरिन् । नीति निर्माणसँगै सरकार संचालनमा पत्रकारहरुले दिएका सुझावहरु महत्वपूर्ण हुने विश्वास समेत व्यक्त गरिन् ।